Þeir sem vinna við vefstjórn eiga stundum erfitt með að útskýra í hverju starf þeirra felst. Það eru ýmsar ranghugmyndir í gangi og víða vantar upp á skilning og virðingu fyrir starfi vefstjórans. Það er okkar að fræða og breyta þessu en verum þolinmóð. Starf vefstjórans er tiltölulega nýtt starfsheiti og enn í mótun.

Eftirfarandi samtal, sem var hlerað í íslensku fjölskylduboði í vor, gefur hugmynd um innsýn og virðingu venjulegs Íslendings fyrir starfi vefstjórans. Nöfnum hefur verið breytt.

Fjölskylduboðið

Persónur og leikendur:
Nína, 58 ára bókari hjá Hagræðingu ehf og frændi hennar Jón, 32 ára vefstjóri hjá Fyrirmyndarstofu ríkisins.

Nína bókari: „Sæll, mikið er langt síðan. Þú gekkst menntaveginn ólíkt mörgum í fjölskyldunni. Mikið hlýtur móðir þín að vera stolt af þér. Æ ég vildi að sonur minn myndi hysja upp um sig buxurnar. En hvað um það. Hvað gerir þú í dag vinur?“

Jón vefstjóri: „Hæ frænka, ég sé um vefmál hjá Fyrirmyndarstofu. Er vefstjóri.“

Nína: „Já veðmál, áhugavert. En er það ekki ólögleg starfsemi? Þarf vélstjóra í það?“

Jón: „Nei sko vefmál með effi. Ég stýri vefnum eða þú kallar það kannski heimasíðu, er vefstjóri sko.“

Nína: „Æ fyrirgefðu, fannst þú segja annað. Ég setti upp heimasíðu fyrir saumaklúbbinn um daginn. Það var nú frekar einfalt. Er þetta ekki huggulegt starf?“

Jón (orðinn smá pirraður): „Huggulegt, jú en það er erilsamt og krefjandi. Mikið að gera.“

Nína: „Já það eru allir svo uppteknir. Ert þú þá svona að hanna vefinn?“

Jón: „Nei, ég geri það nú ekki. Við erum með mann í því.“

Nína: „Þú ert þá svona tölvumaður. Það er nú framtíð í því. Æ ég vildi að sonur minn…“

Jón: „Nei sko vefstjóri er ekki að hanna eða forrita…“

Nína (grípur fram í): „Hvað gerir þú þá Jón? Ertu kannski bara að leggja undir á vefnum? Ég hafði kannski þá rétt fyrir mér eftir allt (hlær)“.

Jón (rauður í framan): „Sko, ég skipulegg vefinn, sé um efnið og sé til þess að það sé einfalt og gott að nota vefinn…“

Nína (búin að missa áhugann og engu nær): „Jæja Jón minn, ertu ennþá í boltanum?“

Mennt er máttur

Við eigum langt í land en það glittir í von um aukinn skilning og virðingu fyrir störfum okkar. Það helst í hendur við vaxandi mikilvægi vefsins og aukinnar fræðslu og menntunar.

Verum þolinmóð. Að öðlast virðingu samfélagsins tók handverks- og iðnaðarmenn langan tíma. Stétt vefiðnaðarmanna er enn á þroskastigi unglings í árum talið. Samkvæmt orðabókinni erum við meira og minna öll fúskarar í íslenskum vefiðnaði.

Mynd: © Royalty-Free/Corbis